Befikri

Mere daftar ki  khidki ke theek saamne
ek bus stop hai
gaadiyan rukti hai,
sawaari ka intezaar karti,
do paanch second mein nikal leti hai..
har baar ek ajeeb si hulchul paida kar jaati hai..
mein baichain ho uthta hoon..
mere jazbaaton ko tatol ke chali jaati hai..
mein bhi apne ghar se door hoon..
mera bhi man karta hai,
bina kuch soche samjhe
gaadi pe chad jau..
chadte hi conductor se
apne shehar ka naam kahu'n"
aur phir peeche waali seat pe baithkar
itminaan se man mein koi kavita bunu,
kitna khoobsoorat khyaal hai..
har roz apne daftar ki khidki se
gaadiyon ko nikalte dekh
yahi sochta hoon,
befikri kitni badi cheez hai!!!